Disfrutarreko chefek esferifikazioekin egiten duten lanaren bilakaera aurkeztu dute Gastronomikan, kolorea aldatzea edo produktuak inkrustatzea lortu baitute.

Eduard Xatruchek eta Oriol Castrok berriro ere harritu gaituzte agertokitik. Disfrutar etxeko chefek (hirugarrena, Mateu Casañas, Bartzelonako jatetxearen buru gisa geratu da) esferifikaziotik, 2003an elBullin sortu zuten teknikatik, abiatutako bi kontzeptu berri aurkeztu dituzte. Lehenengoa, produktu solidoak (barazki xehatuak, haziak, “nahi dugun guztia…”) kanpoaldeko geruzan inkrustatzeko aukera: abakando-salpikoi zukuaren esferikoekin salpikoi bat egin dute eta salpikoiaren barazki xehatuak txertatu dizkiote. “Hori eginez, bi testura ditugu: esferikoaren likidoa eta barazki kurruskaria, kasu honetan kanpoaldean”, azaldu du Xatruchek.

Bigarren aplikazioak esferifikazioaren kanpoaldeari zein barrualdeari kolorea ematearekin du zerikusia, “hausten denean harridura sor dezan”, azaldu dute. “Guk, eta mundu guztiak, esferikoetan kolorea lortzeko, fruta edo barazki kontzentratu bat gehitzen diogu alginatoari. Baina konturatu gara, denbora gutxian, kolore hori desagertu egiten dela”. Hori gerta ez dadin, esferifikazioarekin jolasteko, Disfrutarrekoek “kolore anitz eta iraunkorreko esferikoak” aurkeztu dituzte, koloragarri solidoekin egindako lanaren emaitza gisa. 

Teknika horrekin, Xatruchek eta Castrok “Urre likido” deritzona aurkeztu dute: gorringorik gabeko arrautza baten gainean frijitu dute arrautzaren gorringoaren tamainako ganba saltsaren olioarekin egindako perla bat, urrez estalitakoa. "Chilicrabezko arrautza frijitu bat” izena jarri diote, eta “kabiarra ez den kabiarra”rekin zerbitzatu dute, hau da, adibidez, oliba-olioz egindako esferiko batzuekin, bisualki kabiarra diruditenekin, baina kabiarra ez direnekin. 

Katalanek, euren hitzaldia amaitzeko, Girovaparekin egiten dituzten fruta-zukuen eta landare esneen murrizketak aurkeztu dituzte (zortzi bat orduz). Girovapa hutseko destilagailua da, alkoholik gabeko ardoak egiteko erabiltzen dutena eta Madrid Fusiónen azken edizioan aurkeztu zutena. “Murrizketak —adierazi du Xatruchek— interesgarriak dira, testura desberdinak sortzen dituztelako, krematsuagoak, jarabea bezalakoak kasu batzuetan, eta hainbat eta hainbat aplikaziotan erabil ditzakegulako”.