El Celler de Can Rocako chefak bere karreran eragin handiena izan duten chefak eta logika frantsesak errepasatu ditu, eta kutsu galiarrak dituen bere gaur egungo menuko hiru plater kozinatu ditu. Hori guztia "omenaldi moduko hitzaldi" batean.

"Hitzaldi hau omenaldi modukoa da. Omenaldi bat guri irakatsi zigun, profesionalizatu gintuen sukaldaritzari" hasi da esaten Joan Roca San Sebastian Gastronomikan eman duen hitzaldian. Zeren "80ko hamarkadan hasi ginenean bai Pituk bai nik Frantziari begiratzen genion". Sukaldaritza frantziarrari, oro har, eta izen batzuei, eta El Celler de Can Roca*** (Girona) jatetxeko chefak hauek aipatu ditu bereziki:

Jacques Pic
"80ko amaieran, Pituk eta biok Valencera bidaiatu genuen Pic jatetxean jateko. Bisitatzen genuen lehen jatetxe frantziar handia zen, eta zirrara eragin zigun eta etxe handiaren kontzeptuagatik inspiratu gintuen. Hor hauxe esan genuen: "Hemendik heldu behar diogu."

Georges Blanc
"1991n stage bat egin nuen Blanc jatetxean. Garai hartan pulardaren bularkiak hutsean kozinatzen zituen. Ikusi nuen emaitza interesgarria zela, baina hobetu zitekeela, eta hortik urte batzuetara sortu zen Ronerra. Blancen kasuan, zeukan talde handiak eragin zidan. Etxe handi bat zen".

Michel Guérard
"Bere liburuek inspiratu ninduten. Hainbat aldiz bisitatu nuen eta gaur egun ere harremana dugu. Nire semeak sukaldaria izan nahi du, eta bisita batean Michelen izaerarekin eta pasioarekin maitemindu zen".

Frédy Girardet
"Bere liburu Sukaldaritza espontaneoa garrantzitsua izan da nire karreran".

Pierre eta Jean Troisgros
“Cesar Troisgrosek, Pierren bilobak, stage bat egin zuen El Celler jatetxean. Eta hori sari bat baino gehiago baloratzen dugu. Ohorea izan baitzen. Gainera, Troisgrostarrak inspirazio iturri sinestezina izan ziren. Anaiak ziren eta batera egiten zuten lan, beraz, paralelismo bat zegoen gurekiko. Foiea hutsean kozinatzen hasi zirenak izan ziren".

Joël Robuchon
"Bere liburuek, bere jatetxeek, sukaldaritza ulertzeko duen erak, bere lan zehatzak. Asko inspiratu gaituzte. Are gehiago erbia Royal erara lehen aldiz prestatu genuenean.

Pierre Gagnaire
"Bere lehen jatetxeak eragin zidan. Garai hartan gainezka egiten zuen sorkuntza hark, orain mantentzen duen berak. Inspiratzeko etengabeko iturria da".

Michel Trama
"Sagar kurruskariak guztiok erabili ditugu. Harengandik fruten xaflak nola karamelizatu ikasi genuen.

Alain Chapel
"Bere liburuak gogoratzen ditut, non azaltzen zuen sukaldaritza errezetak baino askoz gehiago dela".

Michel Bras
"Guztiei, baina bereziki Jordiri eragin zion. Bere Anarkiarekin berrintepretatu zuen, haren gargouillourekin nolabaiteko erlazioa duena.

Alain Senderens
"Pituri arreta eman zion Senderensek platerak sortzeko ardoetan inspiratzeko zuen moduak. Haren ardoaren eta sukaldaritzaren arteko harremana ezinbestekoa izan zen".

Chefak errepasatu ostean, Rocak sukaldaritza frantziarra goratzen jarraitu du bere liburuengatik ("Gomendatzen dizuet liburuak irakurtzea, izan frantsesak ala ez izan, zeren dena ez dago Interneten", adierazi du), eragin horietako batzuk kozinatzen hasi aurretik. 

Hasteko, tenperatura baxuan egindako pulardaren brioche bat egin du, "non briocheak ez duen funtzio estetikoa bakarrik baita praktikoa ere, zeren bere hartzidurak betegarriaren tenperatura mantentzen du". Jarraian prestatu ditu, batetik, mihi arraina meunière erara plateraren bertsio bat, hutsean egindako trontzoekin eta parrilla ukitu batekin zerbitzatzeko unean, eta, bestetik, arbi apioaren, udarearen eta artobeltzaren milorria. Labean egindako udare xaflak dituen plater bat da hau ere "eta forman eta prozesuan Alain Ducasseren hostoreko briochea gogorarazten du" adierazi du. "Bai, Frantziak inspiratu gaitu".