“Las Recetas de Julie” (Julieren Errezetak) telebista saioaren aurkezleak jaso du San Sebastian Gastronomikak kazetaritza gastronomikoko profesionalik onenari ematen dion saria. Gastronomiaren arloko kazetari eta dibulgatzaile gisa egindako lanari esker jaso du Kazetaritzaren Pau Albornà saria 

San Sebastian Gastronomika - Euskadi Basque Country kongresuaren bigarren jardunaldian, Julie Andrieu kazetari, kritikari gastronomiko eta Frantziako telebistako izarra den kazetariak Kazetaritza Gastronomikoaren Pau Albornà i Torras saria jaso du, Frantzian barrena eta planetaren zati batean barrena bidaiatuz munduko sukaldeak eta kulturak ezagutzeko egindako lanagatik. Aurreko edizioko saridun Ignacio Medinaren hitzetan, “programa bakoitzean gaur egun sukaldean hizpide dugunari buruz hitz egiteagatik: produktuaz, ekoizleak, errespetuaz, jasangarritasunaz eta sukaldaritzarekiko zaletasuna berreskuratzeaz”.

Horregatik guztiagatik jaso du saria frantziarrak, Pedro Subijanaren eta Juan Mari Arzaken eskutik, Julieren errezeta programaren jarraitzaile leialak direnen eskutik. “Emazteak eta biok ez dugu bat bera ere galtzen”, zioen Akelarrekoak, eta bere esker ona adierazi du: “Eskerrik asko. Oso hunkituta nago hemen egoteagatik eta sari hau jasotzeagatik. Baita Espainiatik datorrelako ere, espainiarrek ematen baitidate berotasun gehien”.

Andrieuk aitortu du bere lana egitean —“esaiozu komunikazioa, kazetaritza, errealizazioa, idazketa…”— jarraitzen duen xedea “sukaldaritzaz hitz egin dadin lortzea” dela. Bai gastronomia mailan, bai familiaren mailan, nahiz eta hori izan gehien interesatzen zaiona: “Eguneroko sukaldaritzaz hitz egitea gustatzen zait, familienaz, hori baita gure kulturaren oinarria”.

Julie Andrieu Gastronomikako kazetaritza gastronomikoaren saria jaso duen bederatzigarren sariduna da —bigarren emakumea—, Ignacio Medinaren ondoren. Aurretik, Cristina Jolonch (2019), Anthony Bourdain (2018), Nick Lander (2017), Xavier Agulló (2016), Mitxel Ezquiaga (2015), Pau Arenós (2014) eta Óscar Caballero (2013) izan ziren saridunak.

Julie Andrieu

Lau urtez argazkilari gisa aritu ondoren, sukaldean aritzearen plazera ezagutu zuen, eta berehala egin zuen bere grinaz ogibide. Hogei bat sukaldaritza-liburu argitaratu ditu, eta idatzizko eta irratiko komunikabide askotan kolaboratzen du, nahiz eta telebistan garatu duen bere ibilbide profesionalaren zatirik handiena, Cuisine TV, TF1, France 5 eta France 3 telebista kateetan. Las Recetas de Julie/Julieren Errezetak programa Televisión Españolako L2 katean ere ematen da.