Pedro Subijanak bere jatetxe Akelarren aurten eskainiko duten aperitiboen bilduma aurkeztu du bere hitzaldian, eta nabarmendu du elikagaiak xahutzearen aurka egitea ohikoa zela araudiak hura suntsitu aurretik.

"Urtero nire buruari esaten diot azkenekoa izango dela, uste baitut gurekin kokoteraino egongo zaretela, baina, azkenean, beti etortzen naiz. Batik bat, nire taldearengatik" adierazi du Subijanak agertokian berarekin batera zeuden hiru pertsonak aurkeztu baino lehen. Bere jatetxe Akelarren aurten eskainiko duten aperitiboen bilduma erakusteko zeuden agertokian.

Euskal sukaldaritzaren aitak azaldu du jatetxeko aperitiboak aldatzen joan direla urte hauetan guztietan zehar, eta proposamen gastronomikoaren hain elementu garrantzitsu bihurtu zen non partida propio bat behar izan zela. "Ikasgelan egiten ditugu prestaketa eta proba guztiak. Horietatik % 90etik gora baztertu egiten dira, ez dutelako funtzionatzen edo uste dugulako ez dutela behar adinako mailarik" adierazi du. Bonboi kaxa izena jarri zioten bilduma diseinatu zuten urtean, sukaldariak esan du hasieran proiektua alde batera utzi zutela ontziteriaren kostu handiarengatik. "Astakeria bat eskatzen ziguten, baina hiru izarrak lortu genituen, zerbait berria egin nahi genuen eta geure buruari hau esan genion: aurrera, ekar dezatela kosta ahala kosta!" azaldu du era barregarrian, ondorioz, barreak entzun dira auditoriumean. Une hari dagokionez, gogoratu du, halaber, bere lagun Arguiñanok eman zion aholkua: "Orain ez aldatu, ez zaitez gauza berriak egiten hasi, izarrak emateko arrazoia egin duzuen lana izan baita, eta ez egingo duzuen lana".

Jarraian, Subijanak bideo bat jartzeko esan du aperitibo hauetako bi nola prestatzen diren ikusteko. Pantailan ikusi ahal izan dira izkiratzarraren tartarra eta wasabia dituen kruxpeta eta antxoa eta piper kremaz betetako makaroia oliba hautsarekin. Beste biak, patata eta urdaiazpiko tarteak agertokian prestatu ditu bere taldeak.

Aperitiboak amaitu ondoren, Pedrok adierazi du euskal sukaldaritza tradizionala mantentzeko zuen nahia gauzatu ahal izan duela Akelarre hoteleko Espazio Oteizan, non Akelarreko lehengo platerak ez ezik beste plater batzuk ere aurki daitezkeen. Horien artean dago piperbeltz saltsa duen lupiaren bertsio berri bat, bere taldeak zuzenean prestatu duena. 

Joan baino lehen, Subijanak gogoeta hau egin du: "Gaur egun, besteak beste, trazabilitateaz, 0 hondakinez eta elikagaiak aprobetxatzeaz hitz egiten da. Duela urte batzuk botilatxoak itzultzen ziren birziklatzeko, ogi gogorra oiloei ematen zitzaien edo ogi birrindu bihurtzen zen; produktuen azalak edo hondakinak animaliak elikatzeko ziren... baina gero arauak etorri ziren... bateko Osasun sailak, higiene arrazoiengatik, hau eta hori egitea debekatzen zuela, besteko Ogasunak ez dakit zer egitea eragozten zizula... Gure bizitza aldatu zuten. Eta orain diote gauzak lehen bezala egin behar ditugula berriz".  Argudio horrekin publikoak gogoberotuta erantzun du, argi gelditu baitzaio sukaldariaren iritzia bere azken hitzen ondoren: "Hara bestea".