Diego Schattenhoferrek, Tenerifeko 1973 Taste jatetxeko chef exekutiboak, Sebastian Gastronomika – Euskadi Basque Countryn pomada gastronomiko bat lortzeko ikerketa bat aurkeztu du. Horren helburua da, Covid-19ak ahoan infektatzeko aukera aldi batez blokeatzea. 

Ikerketa Zientifikoen Kontseilu Gorenarekin (CSIC) elkarlanean, Schattenhofer azken hilabeteetan produktu baten garapen gastronomikoa aritu da lantzen. Produktu hori menu batean sartu ahal izango da, eta Covid-19aren aurrean profilaktiko gisa jarduteko behar diren antigorputzak izango ditu. 

Kanarietan bizi den argentinarrak adierazi du ikerketaren oinarria beste ikerketa bat dela, eta bertan frogatzen dela oilo bat immunizatuta dagoenean arrautzan kontzentratzen dituela antigorputzak. Animaliari hornitutako antigorputzak aurrez egin dira birusaren proteina batzuekin, hau da, giza zeluletara eranstea ahalbidetzen dioten proteinekin. Ondorioz, oilo immunizatuaren arrautza erabiltzen bada produktu gastronomiko bat egiteko, jaten denean antigorputzek birusari eragotziko diote ahoko zeluletara itsastea, baita faringekoetara eta esofagokoetara ere. Birusa agertzen bada, antigorputz horiek inguratu ahal izango dute eta sabelera eraman ahal izango dute, eta hor urin gastrikoek suntsitu ahal izango dute. 

Aurkeztutako ikerketaren hasierako fasean, Diego Schattenhofer "pozik eta itxaropentsu" dago, ostalaritzaren sektorearentzat gaur egungoaren moduko garai zailetan elikadura segurtasunaren arloan eskainiko dituen aukerengatik. Chefak berak hau onartu zuen: "zientziak lanean jarraitu behar du" aurkikuntza honen ezaugarri guztiak garatzeko, baina, era berean, gastronomia pentsatzen ari da pomada hau produktu gastronomiko bihurtzeko moduan; horrela, menuan sartu ahal izango litzateke eta kontsumitu ahal izango litzateke. Ildo horretan, Schattenhoferrek hau azaldu zuen: "antigorputzak dituzten arrautzen gorringoaren zati urtsuarekin konposatuak egin ditugu gofioarekin lantzeko, adibidez". 

Bazeuden oraindik gauza ezezagun batzuk argitzeko, baina proiektu honetan lanean ari den taldeak uste du produktu hau janda sortuko den babesak txistuan bi orduz iraungo duela, gutxi gorabehera. Era berean, 1973 Taste jatetxeko chefak ziurtatu du kantitate txiki bat –"gramo erdi eta gramo bat bitarte"– nahikoa izango litzatekeela nahi den efektua lortzeko. 

Hitzaldiko gidari Xavier Agulló kazetariak eta Julia Pérez Lozano eta Clara Pérez Villalón komentarista eta kazetari gastronomikoek –San Sebastian Gastronomika – Euskadi Basque Countryren edizio honen plato nagusian zeuden– galdetu diote produktu berria ea noiz merkaturatuko den, eta sukaldaria zuhurra izan da. "Utz diezaiogun zientziari lan egiten" eskatu du, eta esan du hainbat lan ildo daudela irekita balizko merkaturatze baterako. "Ikusiko dugu nola produzitzen den produktua. Aukeretako bat izan daiteke liofilizatzea, kontserbazioa bermatzeko". Zalantza horiek argituko dira denborak aurrera egin ahala, baita ziurtatze zientifikoaren prozesuekin eta ondorengo merkaturatzearekin ere.

Tenerifeko itsas fauna berreskuratzeko lanean

Baina San Sebastian Gastronomika – Euskadi Basque Countryn aurkeztutako berri horretaz gain, Diego Schattenhoferrek uharteko itsas faunako espezie ahaztu edo baztertu batzuk berreskuratzeko lan ildo interesgarri bat azaldu digu, Tenerifeko Kabildoak babestutako hitzaldi batean. Adibidez, karramarro gorri handia eta izkira arrunta. Cristianos izeneko portuko arrantzaleen laguntzarekin, Schattenhoferrek eta Gastrosinapsisek (gastronomiak hainbat adar zientifikorekin lan egiten duen diziplina anitzeko taldea) lortu dute espezie horietako baten bat arrantzatzea, eta, ondoren, chefak sukaldean prestatu ditu. 

Aurkezpenean, Diegok plater bat prestatu du karramarro gorri handia eta izkira arrunta involtinisetan zituena, eta Kanarietako bi plater tradizionalekin batera hornitu du: eltzeko eta arrantxo kanariarra. 

Inguruko produktuekin lan egiteko eta bertako espezieak berreskuratzeko nahiarekiko leiala denez, Schattenhoferrek Tenerifeko arrain ezagunenaren, viejaren, bere bertsioa erakutsi du, baita belar endemikoekin elikatutako hango oiloekin egindako plater bat ere. 

Tradizioaren alde egiten du, zientziaren eta ikerketaren eskutik.